Eldslogar í augum Hans
©24. ágúst 2008 Asher Intrater

Í Opinberunarbókinni er þrisvar talað um að Yeshua (Jesús) hafi „eldsloga í augunum.“

Þessi kraftur, „pyros“ kraftur Guðs, er sami andlegi eldurinn og birtist Móse í brennandi runnanum (2. Mósebók 3), í eldstólpanum við Rauðahafið (2. Mósebók 14) á Sínaífjalli (2.Mósebók 19), á altarinu í tjaldbúðinni (3. Mósebók 9 og 10), birtist Esekíel í dýrðarskýinu (Esekíel 1) og í strauminum frá hásæti Guðs (Daníel 7).

Þessi himneski eldur féll líka á lærisveinana á Hvítasunnudag (Shavuot), Postulasagan 2. Eldurinn hvíldi ekki á þeim í smá stund eins og afmæliskerti á köku, heldur fór innvortis. Ef einhver hefði litið í augu Péturs, gæti sá hinn sami, hafa sé sama eld brenna þar og Jóhannes skírari sá í augum Yeshua.

1. Ástríða

Í Opinberunarbókinni, þá er eldurinn sá sami í öllum þrem tilvísununum, en tilgangurinn ólíkur. Fyrst, þá birtist Yeshua, Jóhannesi persónulega, sínum elskaða lærisveini og besta vini. Eldsloginn er ástríða.

Opinberunarbókin 1:12-14
Ég sneri mér við til að sjá hvers raust það væri sem við mig talaði. Og er ég sneri mér við sá ég sjö gullljósastikur og milli ljósastikanna einhvern, líkan mannssyni, klæddan skósíðum kyrtli og gullbelti var spennt um bringu hans. Höfuð hans og hár var hvítt eins og hvít ull, eins og mjöll, og augu hans eins og eldslogi.

Yeshua er ekki að ávíta Jóhannes. Hann er að fara að gefa honum eina stórkostlegustu opinberun allra tíma. Hann elskaði Jóhannes, eins og Davíð elskaði Jónatan. Yeshua hefur þessa ástríðu í elsku sinni til okkar allra sem tilheyra brúði Hans. Þetta er ástríða brúðgumans í Ljóðaljóðunum (Ljóðal. 8:6) Á hebresku er þetta kallað: „Shalhevet-Yah“. Afprýðisemi og ákafi: þetta er ást í sinni hreinustu og tilfinningaríkustu mynd.

2. Hreinleiki

Í annað sinn er talað um eldinn í skilaboðum Yeshua til safnaðarins í Þýatíru. Þrátt fyrir að Hann elski líka fólkið þar, þá ávítar Hann það fyrir málamiðlun í siðferði. Sérstaklega vegna þess að fólkið leyfði kynferðislegt siðleysi, falska spádóma og anda Jessebel í söfnuðinum.

Opinberunarbókin 2:18-20
Og engli safnaðarins í Þýatíru skalt þú rita: Þetta segir sonur Guðs, sem augun hefur eins og eldsloga og fætur hans eru líkir glómálmi:
Ég þekki verkin þín og kærleikann, trúna, þjónustuna og þolgæði þitt og veit, að verk þín hin síðari eru meiri en hin fyrri.
En það hef ég á móti þér, að þú líður Jessabel, konuna, sem segir sjálfa sig vera spákonu og kennir þjónum mínum og afvegaleiðir þá til að drýgja hór og eta kjöt helgað skurðgoðum.

Sami eldur Guðs og fyllir okkur af guðdómlegri ástríðu, hreinsar líka frá synd. Vitaskuld getur sami eldur og eldar matinn þinn, líka brennt þig á hendinni. Krafturinn sem gerði Pétri kleift að reisa upp dauða (Post. 9:40), varð þess valdandi að aðrir duttu niður dauðir við prédikun hans. (Post. 5:5, 10).

3. Refsing

Þriðja skiptið er jafnvel enn áhrifaríkara: himnarnir opnast og Yeshua kemur niður í endurkomu sinni, leiðandi herfylkingar Guðs. Hér kemur hann ekki til að hreinsa heldur til að refsa. Það er ekki lengur tími til iðrunar. Hann hefur komið til að eyða óvinum Guðs.

Opinberunarbókin 19:11-15
Þá sá ég himininn opinn, og sjá: Hvítur hestur. Sá, sem á honum sat, heitir Trúr og Sannur, hann dæmir og berst með réttvísi. Augu hans eru sem eldslogi og á höfði hans eru mörg ennisdjásn. Og hann ber nafn ritað, sem enginn þekkir nema hann sjálfur. Hann er skrýddur skikkju, blóði drifinni, og nafn hans er: Orðið Guðs.
Og hersveitirnar, sem á himni eru, fylgdu honum á hvítum hestum, klæddar hvítu og hreinu líni. Og af munni hans gengur út biturt sverð að slá þjóðirnar með, og hann stjórnar þeim með járnsprota. Og hann treður vínþröng heiftarreiði Guðs hins alvalda.

Að síðustu mun Satan, anti-kristi og öllum þeim sem hafa verið andsnúnir vilja Guðs verða kastað í eldsdýkið (Opinb. 19:20, 20:10, 20:15). Djöfullinn mun ekki ríkja í eldsdíkinu, hann verður kvalinn þar. Eldur helvítis er reiðieldur Guðs (5. Mósebók 32:22).  Skilningur okkar á refsingu Guðs í eldinum, tendrar hjá okkur hreinan, sannan og eilífan ótta gagnvart heilagleika Guðs og mikilleik (Lúkas 12:4, Sálm. 19:9).

Gluggi og Spegill

Jóhannes sá eldsloga í augum Yeshua. Auga er með holu í miðjunni – sjáaldur, sem er svipað og ljósop á myndavél. Þetta er einskonar gluggi. Uppspretta eldslogans er ekki í augum Yeshua, heldur í hjarta Hans. Eldurinn brennur djúpt í sálu Hans (Lúk. 12:49) og þráir að tendrast í hverju og einu okkar.

Augað hefur líka augastein sem hylur hornhimnuna, eins konar spegil. Þegar þú horfir í augun á einhverjum þá sérðu þína eigin mynd endurspeglast. Þegar við horfum í augu Yeshua, þá mun eldurinn sem er innra með Honum, flæða í gegnum okkar augu, inní sálu okkar. Þessi orkuflutningur gerist ekki í gegnum okkar náttúrulegu augu, heldur andlegu (Efesus 1:18).

Sumt fólk fer á ráðstefnu eftir ráðstefnu til að fá eld Guðs. Samt stendur okkur til boða afdráttarlaus, persónulegur aðgangur að eldi Guðs, hvenær sem er. Það eina sem við þurfum að gera er að loka okkar líkamlegu augum, íhuga útskýringar ritninganna á eldslogunum í augum Yeshua, sjá fyrir okkur hvernig hann horfir í augu okkar, augliti til auglitis; eldur andans mun byrja að flæða frá Hans sál, yfir til okkar.

Augun eru staðsett fyrir miðju andliti. Þegar við íhugum skínandi andlit Hans, þá ummyndumst við í sömu mynd (2. Kor. 3:18).  Þessi andlega ummyndun, sem á sér stað þegar við hugleiðum dýrð Guðs í ásjónu Yeshua, er lykillin að því að skilja hvað felst í blessunarorðunum „Drottinn láti sína ásjónu lýsa yfir þig“ (4. Mós. 6:25). 
Blessunarorð Arons eru uppfyllt í Yeshua, æðsta presti okkar.

Reyndu að eyða tíma á hverjum degi í að hugleiða eldslogann í augum Yeshua. Megi sá dásamlegi andlegi eldur ástríðu og hreinleika tendrast innra með þér!